مرة فى واحد كسر الباب
وقال يا سياد البيت دستور
قلت باين له اليوم ده هباب
تسمح تمشي كده وتغور
قام راح تف ... رزعنى بكف
خلى الفك سنين مكسور
وراح متلافي ..... عظم كتافى
تقولش دى كلب وكان مسعور
*****
وقال يله اركب ... خلص يا بنى
الظاهر إنك ... واد فرفور
حلفت بربي ما ماشي معاك
لو حتى ياجينى ميت مأمور
خبطنى بـ بكس .... فطيت ف البوكس
شاعركم يومها كان معذور
وفضلت ألف ..وألف معاه
ذكرني بعجل وكان منذور
*****
ولما وصلت هناك .... قال إنزل
وقفْ ... غنى... مع الجمهور
وقفت فى صف طويل معوج
والكل يا عينى كان مقهور
ولما سألنى هناك عن إسمى
قلت يا باشا أنا المحسور
راح مدينى قلم فى قفاى
رحت عاملها على الكاستور
*****
وفجأة أخذنى على التخشيبة
فى غرفة عجيبة... ما فيهاش نور
ولما سألته .... يا سيدنا البيه
هنا رح أموت .... قال لى دى شور
قلت خلاصك .. سيبنى أصوت
عقلي أمبارح... كان مخمور
وأوعدك إني ... أجند نفسي
وتجعل منى عميل مأجور
*****
قال تسلم لى .... يا نن عيونى
أنا دى الوقت بقيت مسرور
كل ذنوبك رح نغفرها
بس بشرط تعيش طرطور
قلت دى أجمل عيشة معاكم
عيشة تخلى الدنيا زهور
عيشة تخلى الناس في بلدنا
تقول جود نايت .... أو بونجور
لكن الخوف الدم الحامى
من عمايلكو عليكو يفور
*****
قال ماتخافش ...ده احنا سيادكم
وياما حكمنا عصور ودهور
بغمزة عين من رمش عيونا
سبع الليل هيصير عصفور
ياما شارينا ذمم خربانه
كان بتفكر بكره تثور
ويوم ما الشعب علينا ينهق
ننخزه نخزه بسن خابور
فجأة الدم الحامي اتغير
وقلت الشعب يغور ويغور
نزلت في نص الشارع أنادى
ينصر دينك يا دستور
ليست هناك تعليقات:
إرسال تعليق